Беларускі Дзяржаўны Музей Народнай Архітэктуры і Побыту

Беларускі дзяржаўны музей народнай архітэктуры і побыту займаецца ўкараненнем у практыку педагагічнай ідэі шляхам арганізацыі музейна-педагагічных заняткаў. Гэты накірунак працы са школай – дадатковая форма культурна-адукацыйнай дзейнасці музея. Музейна-педагагічныя заняткі прадугледжваюць працу з дзецьмі старэйшага дашкольнага ўзросту і навучэнцамі сярэдніх адукацыйных устаноў з выкарыстаннем музейных прадметаў (таксама копій, дублікатаў, мадэляў, фотаздымкаў). Засваенне атрыманых ведаў ажыццяўляецца ў працэсе ролевых гульняў і іншых метадаў і прыёмаў. Музей прапануе шэраг тэм музейна-педагагічных заняткаў:

“Прывітанне, музей” (1-2 клас),

“Гісторыі з жыцця музейных прадметаў” (1-2 клас),

“Народны ўзор” (3-4),

“Салдацкі куфэрак” (6-8 клас),

“Народныя абразы з калекцыі музея” (9-11 клас) і інш.

Музейна-педагагічныя заняткі праводзяцца ў навучальных установах па папярэдніх заяўках.

Абрады з’яўляюцца састаўной часткай традыцыйна-побытавой культуры кожнага  народа. Яны з’яўляюцца сукупнасцю традыцыйных умоўных дзеянняў, сімвалічна выражаюць і замацоўваюць адносіны людзей да прыроды і паміж сабою ў важкіх жыццёвых сітуацыях. Музей захоўвае і адраджае беларускія традыцыі і абрады, прапануючы ўсім жадаючым прыняць удзел у абрадавых мерапрыемствах.

Толькі з 15 снежня па 20 студзеня ў наведвальнікаў ёсць унікальная магчымасць стаць удзельнікамі ролевай гульні “Калядоўшчыкі”  абрадавага мерапрыемства “Каляды”.

На працягу ўсяго года маладых да сябе запрашае музей, прапаноўваючы адсвяткаваць нараджэнне сваёй сям’і. Маладыя пазнаёмяцца з вясельнымі традыцыямі нашых продкаў кан. ХІХ – пач. ХХ стст., пачуюць незвычайныя вясельныя абарачэнні і выказванні, прымуць удзел (разам са сваімі гасцямі) у абрадавых дзеях мерапрыемства “Беларускае вяселле”.

Сярод наведвальнікаў рознага ўзросту попытам карыстаюцца тэматычныя экскурсіі з інтэрактыўнымі элементамі. Падчас іх правядзення экскурсанты становяцца актыўнымі ўдзельнікамі: маюць магчымасць паспяваць пад баян, патанчыць народныя танцы, пагуляць у этнаграфічныя гульні, паспрабаваць сваю моц у іспытах, паваражыць аб будычым і г.д.

Экскурсія “Пшанічны каласок” разлічана на дзіцячую аўдыторыю (1-2 клас). Падчас яе правядзення ў даступнай гульнёвай форме школьнікам расказваецца аб працэсе пераўтварэння маленькіх зярняткаў ў пахучы бохан хлеба. Сустрэча з “Дамавіком” застаецца ў памяці маленькіх наведвальнікаў надоўга.

Знаёмства дзяцей і дарослых з персанажамі беларускай міфалогіі адбываецца на зімовай экскурсіі “Дзівосны свет народнай фантазіі”. Карагод з богам усіх марозаў “Зюзяй” з’яўляецца кульмінацыяй цікавага падарожжа.

З красавіка па чэрвень і дзецям і дарослым прапаноўваецца экскурсія “Камаедзіца”, прысвечаная пакланенню нашых продкаў мядзведзю-бацюхну.

На працягу года можна замовіць экскурсію “Вандроўка ў мінулае”. Падчас пазнавальнай экскурсіі, якую праводзяць супрацоўнікі музея ў народных строях, наведвальнікі “вандруюць” па музейнай вёсцы, гуляюць у традыцыйныя гульні, танчаць і спяваюць.

Разнастайныя тэматычныя экскурсіі дазваляюць неаднаразова наведаць музей і падрабязней пазнаёміцца з матэрыяльнай і нематэрыяльнай спадчынай беларускага народа. Яны праводзяцца на беларускай і рускай мовах. З характэрнымі асаблівасцямі народнай драўлянай архітэктуры і побыту гісторыка-этнаграфічных рэгіёнаў Беларусі наведвальнікі даведваюцца на экскурсіях па экспазіцыйных сектарах: “Цэнтральная Беларусь”, “Падняпроўе” і “Паазер’е”. На англійскай мове падрыхтавана экскурсія па экспазіцыйнаму сектару “Цэнтральная Беларусь”. Экскурсія “Беларускі лён” па выстаўцы, якая размешчана ў памяшканні помніка народнай архітэктуры “Гумно з в.Заброддзе Стаўбцоўскага р-на” (сектар “Цэнтральная Беларусь”), знаёміць з традыцыйнымі прыладамі працы па апрацоўкі ільну на Беларусі ў кан.ХІХ – пач.ХХ стст., а таксама з фотаматэрыяламі па сучаснаму тэхналагічнаму працэсу.

Пра борці, калодныя і рамавыя вулеі расказваецца на экскурсіі “Пчалярства на Беларусі”. Выстаўка на гэтую тэму знаходзіцца ў паветцы помніка народнай архітэктуры “Вяночны двор з в.Волева Дубровенскага р-на” (сектар “Падняпроўе”).

Веды аб сухапутных і водных відах транспарту, а таксама аб іх выкарыстанні можна атрымаць на экскурсіі “Транспартныя сродкі на Беларусі”. Сані, мажары, калёсы і інш. выстаўлены ў памяшкані помніка народнай архітэктуры “Пуня з в.Ваўкашчына Міёрскага р-на” (сектар “Паазер’е”).

Экскурсія з’яўляецца вядучай формай культурна-адукацыйнай дзейнасці музея, спецыфіка якой вызначаецца характарам і тэматыкай музейнага асяроддзя і экспанатаў. Аглядавая экскурсія "Беларускі скансэн" знаёміць наведвальнікаў з характэрнымі асаблівасцямі народнай драўлянай архітэктуры і побытам беларусаў кан. XIX - пач. XX стст., характэрных для гісторыка-этнаграфічных рэгіёнаў “Цэнтральная Беларусь”, “Падняпроўе”, “Паазер’е”. Экскурсія праводзіцца на беларускай і рускай мовах па трох дзеючых экспазіцыйных сектарах “Цэнтральная Беларусь”, “Падняпроўе”, “Паазер’е”.